.png)
華爾街人手必備嘅Patagonia 羽絨背心
【華爾街個個都著Patagonia，呢個牌子到底有咩過人之處？】天文台都開始發出寒冷天氣警告，搞到日日要着幾層衫先出街🥶 同一時間，喺投行世界入面，你估個個IBankers都淨係著西裝返工咩？梗係唔係啦，其實大部份 IBankers 冬天返工都會不約而同地著同一個牌子—Patagonia嘅羽絨背心，漸漸令到呢件背心成為身份嘅象徵！究竟呢個牌子對 IBankers 嚟講有咩咁吸引？點解會搞到好似制服咁？你又係咪要買返件，著住去面試先會入到投行？想知就俾個❤️再睇落去！
.
【Patagonia小簡介】
Patagonia係美國一個著名嘅户外運動品牌，由 Yvon Chouinard 喺 1973 年創立，總部設立於 Califonia。Yvon 係一個熱愛玩不同户外運動嘅人，而 Patagonia 呢個品牌理念更加貫徹咗創始人嘅風格，一樣咁有活力、咁熱愛大自然。更重要嘅係 ，Yvon 做事好極致，有時候甚至有啲固執地堅持，可能正正因為咁，Patagonia 有一種好打動人心嘅魅力，例如：品牌唔會表現出對於賺錢同擴張業務嘅渴望，反而佢哋經常喺環保方面做一啲超乎尋常嘅宣傳活動。喺 2011 年嘅 Black Friday，Patagonia 買咗《紐約時報》成版廣告位，刊登咗著名嘅 "Don't Buy This Jacket"（「唔好買呢件外套！」）廣告，呼籲大家購物前三思而後行，同埋喺文章度詳細解釋咗消費主義模式對環境造成嘅損害。呢個廣告後嚟仲勁到成為 Harvard Business School 經典嘅 marketing case study，令 Patagonia 一舉成名，而且當年 Black Friday 嘅銷售額都不跌反升！之後，Patagonia 仲宣佈捐出廣告期間嘅全部收入，支持基層環保項目。不過咁，就算公司致力推動環保都好，同投行啲人著Patagonia又有咩關係呢？想知就睇落去！
.
【點解華爾街人人都會著呢個户外運動品牌？】
1️⃣第一個原因當然就係保暖。事關喺 2014 年，對冲基金公司 SAC Capital 嘅老闆 Steven Cohen 為咗令啲 traders 保持頭腦清醒，將 trading floor 冷氣較到 20 度！但佢都唔係唔關心員工嘅，佢擔心員工太凍而影響工作效率，所以佢就每人免費派咗件印有公司 logo 嘅 Patagonia 背心。後期好多大型投行，例如 J.P. Morgan、Goldman Sachs 都同 Patagonia 合作整咗印有公司 logo 嘅背心，慢慢就變成人人都有一件😌 傳聞華爾街嘅頂尖求職者喺面試嘅時候甚至會優先考慮有 offer Patagonia 訂製背心嘅公司。咁誇張？仲誇張啲都仲有！投行市場策略師 Michael Antonelli 曾經講過：「如果有一日我死咗，我會著住我嘅 Patagonia 背心死喺山上，就算係死亡都唔可以將我哋分開。」不過當品牌成名後，有啲機構會將呢啲帶有logo嘅背心用作免費贈品供給客戶。呢種做法就引起咗 Patagonia 嘅不滿，所以 2019 年 Patagonia 就因為環保理由（訂制Logo轉賣困難，會縮短產品壽命），Patagonia 宣佈唔再接受新嘅金融企業客戶，更取消咗訂制 logo 服務啦！
.
2️⃣第二個原因就係身分嘅象徵。Patagonia 嘅價位唔算平，正好低調地展現出金融才俊嘅豐厚收入。正如前面講到，好多世界頂尖嘅投行都會同 Patagonia 合作，新入職嘅員工都會收到一件印有銀行名嘅背心，所以呢款背心自然就會成為咗金錢同成功嘅象徵，甚至喺二手市場度俾人高價炒賣。精英大佬們都對呢套 outfit 情有獨鍾，億萬富豪出席 Billionaire Summer Camp 嘅 Sun Valley Summit 、傳媒大亨 Rupert Murdoch 個仔 Lachlan Murdoch、亞馬遜創始人 Jeff Bezos 都係呢款背心嘅擁躉！就連《泰晤士報》報導標題都係：「想穿到好似個億萬富翁咁？只需要著件馬甲。」就算 Patagonia 依家唔再出 logo 服務，IBankers 都會想自己買返件返屋企🤩
.
3️⃣最後一個原因係潮流嘅變遷，從前大家嘅刻板印象都係個個都着西裝返工，但係其實幾年前開始，大部份投行已經放寬咗制服限制，容許員工着便服返工。咁係因為着便服俾人感覺冇西裝咁嚴肅，同客戶傾偈嘅時候都會感覺親近啲，自然更加容易可以做好 relationship building🤭
.
聽完呢個品牌同華爾街精英嘅故事之後，唔知同學仔係咪都想入返一件 Midtown uniform先呢？依家喺 Patagonia 嘅官方網站都有得賣㗎（👅無收廣告費😂）！
.
最後，如果同學你都鍾意 IBankCoaching 寫多啲投行嘅有趣故事，咁就俾個❤️我哋同 share 個 post 俾你朋友啦！
#achievewithus #hkcareers #ibankcoaching #dse2021 #dse2022 #dse2023 #hku #cuhk #hkust #YourCareerSolutions #Patagonia
