top of page

中環5間高質酒吧｜放工Happy Hours之選


【啱曬你同senior打好關係｜5️⃣大必去嘅中環高質酒吧！】之前IBankCoaching出咗篇文講關於5️⃣間中環嘅特色cafe，反應非常熱烈，所以今次就乘勢追擊，為同學集結左五間超特色中環酒吧😻唔講唔知，喺投行嘅世界入面，其中一個最重要嘅文化就係放工之後成班人一齊去club/bar飲杯酒chill吓😌呢個絕對係一個千載難逢可以跟同事/上司打好關係嘅大好時機！試諗吓平時喺公司做嘢忙到天昏地暗，未必有好多時間可以傾計交流😕相反，放工happy hour氣氛輕鬆啲，飲多兩杯就咩都肯分享你知啦🤭所以今次IBankCoaching就千挑萬選咗5️⃣間富有特色嘅酒吧，到底✅邊間酒吧有得玩board game？✅邊間長期入選「亞洲最佳酒吧50強」榜單？✅邊間性價比最高？Share個post比你朋友再睇落去啦！

.

1️⃣ 【實惠之選】Shady Acres

❇️ 酒吧有超過200款精選葡萄酒同特色雞尾酒俾客人選擇，而且每日都有兩個Happy Hour 時段 (17:00-19:00同23:00-1:00)，葡萄酒同雞尾酒每杯只係$50，仲要唔收加一服務費，價錢實惠親民，性價比真係超高！環境方面，酒吧有書架俾人借書睇，仲有board game玩😍啱哂約同事一邊聯誼、一邊玩board game。

.

地址：中環卑利街46號地舖

營業時間：星期一至日 17:00 - 02:00

.

2️⃣ 【性價比之選】The Pontiac

❇️ 講到性價比最高嘅酒吧莫過於The Pontiac，特別之處係酒吧管理團隊全部都係女性，非常講求男女平等。酒吧裝潢散發出獨特嘅工業風格，充滿低調嘅城市氣息。唔止呀，酒吧仲連續多年入選「亞洲最佳酒吧50強」榜單，所以佢哋手工調製嘅雞尾酒絕對有質素保證！如果上司/同事對雞尾酒有好高要求，去The Pontiac就一定唔會令大家失望！

.

地址：中環奧卑利街13號

營業時間：星期一至六 15:00 - 00:00、星期日 14:00-23:00

.

3️⃣ 【打卡之選】Dragonfly

❇️ 呢間波西米風格嘅酒吧位於「大館」入面，由著名室內設計師Ashley Sutton打造。天花板嘅綠松石玻璃燈飾同黃色蜻蜓裝飾，以及地板嘅馬賽克拼貼圖案互相呼應，鍾意打卡嘅你一定唔可以錯過。講到最特別嘅飲品當然係珍珠奶茶雞尾酒「Dragon's Pearl」！佢以茉香珍珠奶茶為底，加入蜜柑同白蘭地等成份，酒味微甜同埋清新，淨係聽個名都即刻想叫返杯！

.

地址：中環荷李活道10號大館10座地下

營業時間：星期一至四、日 17:00–01:00、星期五、六 17:00-02:00

.

4️⃣【懷舊之選】Foxglove

❇️ Foxglove係一間隱世復古風嘅酒吧餐廳，侍應以中菜、點心、主食、甜品，仲有當然唔少得美酒啦！當中以蝶豆花同薰衣草作主題嘅cocktail最受歡迎。酒吧內部裝潢主要以古典風格為主，就連洗手間都係艙房門造型，令人好似置身喺英倫風嘅大型豪華郵輪，夜晚九點後仲可以欣賞live band嘅音樂表演！ 如果你同事鍾意復古風就記得mark哂呢間酒吧啦！


❇️ 雖然地址係都爹利街，但酒吧入口實際上喺雪廠街㗎！Reception就好似一個賣遮嘅櫃檯，櫃檯前面嘅裝潢同一般高級雨傘店好似。行進去嘅時候，要等服務員扭一扭雨傘柄嘅機關，暗門先會開，然後就可以入去享受美酒美食！

.

地址：香港島中環都爹利街6號印刷行2樓

營業時間：星期一至五 12:00-15:00、17:00-00:00 / 星期六 17:00-00:00 / 星期日休息

.

5️⃣【戶外靚景之選】Plume

❇️ Plume天台酒吧坐落於H Queen's頂層，打造出一個既舒服又不失時尚感嘅露天空間。酒吧設有可伸縮嘅頂篷，俾同學盡情欣賞中環嘅壯麗城市景色！喺特定時間惠顧，葡萄酒只需$50一杯，酒吧仲會提供好多不同類型嘅小食，例如自家製薯條配松露蛋黃醬、櫻桃番茄配Burrata芝士等。望住個靚境飲杯酒，心情自然特別舒暢〜

.

地址：中環皇后大道中80號 H Queen's 頂樓

營業時間：星期二至四 14:00-00:00、星期五至六 14:00-深夜、星期一及日休息

.

當然，同學去之前最好先Google (或者去官網/IG) 留意最新營業時間，以上資料只供參考。如果你有朋友咁啱揾緊酒吧聯誼，咁就記得share呢個post比佢啦！

.


Comments

Categories
Recent Posts
bottom of page